Kryeministri Edi Rama mori pjesë në konferencën “Përballja me Manipulimin e Informacionit dhe Ndërhyrjen e Huaj: Shqipëria dhe Konteksti i Zgjerimit”.
Dezinformimin Rama e krahasoi me ‘Kalin e Trojës’, duke thënë se në ditë e sotme nuk duhet me një ushtri për të destabilizuar një vend.
Si shembull konkret, ai solli rastin e protestave në Tiranë, duke e cilësuar si një rast tipik dezinfomimi.
“Besoj jeni mjaft të informuar për të ashtuquajturin revolucion të flamingove. Është në fakt një shembull i jashtëzakonshëm i një çarjeje që u bë në fakt një mënyrë për të hyrë për armiqtë tanë për të organizuar një operacion shumë të madh troll-esh dhe avatarësh. Ndërkohë që, ecim me vendosmëri drejt fazës së fundit të bisedimeve të anëtarësimit për Bashkimin Europian. Është thelbësore të forcojmë rezistencën kundër kërcënimeve hibride që në fakt nuk është ushtrim burokratik, por një hap mjaft i rëndësishëm drejt ndërtimit të një shoqërie rezistente, duke mos minuar në të njëjtën kohë vlerat e saj demokratike dhe mënyrën e saj demokratike të jetesës”, tha Rama.
Kryeministri tha se në epokën digjitale fuqia e një shteti nuk matet vetëm me kapacitete ushtarake, por edhe me aftësinë për të ndryshuar perceptimin publik.
“Manipulimi dhe ndërhyrja e huaj në informacion kurrë nuk mbërrin me uniformën veshur, mbërrin si indinjatë, trend viral, video të falsifikuar, si një link që çohet në një grup ËhatsApp-i nga një person që mirëfilli mendon se po ndan një të vërtetë, flet gjuhën tonë, shfrytëzon ankthet tona, kjo është arsyeja pse është kaq efektiv. Nuk iu duhet më ushtri për të destabilizuar një vend”, tha Rama.
Kreu i qeverisë u ndal edhe te sulmet klibernetike të Iranit ndaj Shqipërisë.
“Sa më afër shkon një vend drejt Bashkimit Europian, aq më shumë rreken aktorët e huaj të hyjnë tinëzisht brenda dhe të sulmojnë. Jam krenar të them edhe pse jemi sulmuar në mënyrë agresive, ne jemi përgjigjur duke ndëtuar një nga sistemet më të mira të mbrojtjes kundër sulmeve kibernetike në Europë”, tha Rama.
Megjithatë, Rama nënvizoi se mbrojtja e infrastrukturës shtetërore nuk mjafton nëse qytetarët mbeten të pambrojtur ndaj manipulimit masiv të informacionit.